Ka jingbatai ia ka Pansngiat ki nongshad ha ka Shad Suk Mynsiem

Shillong, April 7, 2025: Ka Pansngiat, kaba ki nongshad kynthei ki deng ha ka khlieh, ha ka Shad Suk Mynsiem, ka shim ïa ka bynta kaba kongsan eh ha ka riam shad kynthei. Ka don ruh ha ka, ïa ka jingmut kaba khia bad jylliew shibun. La saiñ ïa ka kyrdan bad ka jingñiewkor ïa ki long kynthei, kum ka jingsien syntiew ba kordor ha ka imlang sahlang, ki longing longsem bad ka longkur longjait, longkha longman. Kumta ha ka dur longkmie, ki kynthei ki long ki nongri nong sumar ïa ka pateng jait. Namarkata, ka dawa na ki long kynthei, ïa ka jinglong khuid bad jinglong sotti kaba nylla ha ka shad ainguh ïa la ka long rynïeng kynthei kumba u Blei u la ibit ban buh ban sei, khnang ba ka shongkha shongman jong ki, kan long kaba beit kaba bha. Ki dei kum ki kynthei, ban sien ïa ka jinglong bad jingleh jingkam ki ban ïa hap ïa biang bad ka jingmut jong kane ka pansngiat. Ki dei ban kilan ïa la ka longbriew ban ym jam palat pud khamtam ha ki kam shongkha-shongman bad kiwei pat ki jingleh.

Kumta ka Pansngiat ‘theisotti ha ka pyrkhat Khasi, ba la pynshong ha ka maiñ ksiar main rupa, ka long ki dak ki shin ki jingbuh jingpynksoh ban ai ïa ka jingmut jingpyrkhat, ki ban kyrsiew pynkyndit kynmaw, ban da sharai peitngor, kum ka kynthei ha ka thew, ka ñiew, ka matang jinglong rynkat ka sneng ka kraw ki kpa ki kñi jong ki longing longsem, shuwa ban kynjoh sha ki kyrdan longmei. 

Ka jingrwai Seng Khasi ba la thaw da u Rangbah H. Teslett Pariat, ka long kumne:

‘Duwan ka longjait, dei ha phi kein lawei, 
To pyndem u ñiuhmat, ha ka mon ba palei; 
Phuhmat ka longïing haba phi shad Suk Mynsiem,
Long jait kan ïai sah, shong ha phi keiñ, ko Syiem!’

Kumta ka Pansngiat ‘theisotti ha ryngkat ka Lasubon bad u ‘tiewshad ki ïeng ban sakhi kum ka jingainguh ba kyrpang jong ki long kynthei ïa la U Blei, Nongbuh Nongsei, shuwa ban jam sha ka kyrdan longmei, ha la ka longbriew bad ban da kyrpad kyrpon naduh khmat u Blei; kum u ‘Lei longkur longjait, longkha longman, ban da ïa hap ïa biang ka jingïaïeid ïathoiñ ba maïa Blei bad ka thoh longkha ka jong U Blei lane ban da ïa hap ïa biang ha Briew ha Blei.

[La sot na ka kot KI SNAP KI SKOR MARDENG SHAD KHASI da I Kong Sweetymon Rynjah]