Poitri Khasi: KA IINGMANE

KA IINGMANE
Da u Mayborn Lyngdoh Ryntathiang

Na jylli ka madan phi mih
Ban doh iaki ummat jongka miet.
Ha jingkynjah mian-mian tied ka baje kumba tem u Kaitor
Bad jingiakynud janai lem bad ki sim bneng ha bneng
Ban Ialam ia Mei bad Papa sha Ingmane,
I’u khun ban pynbaptist
Ha jingiwbih bajanai jong –
U Kpa, U khun bad u Mynsiem-bakhuid.

Ňiuma,
Khatlai snem nangta ki long tang jinglyngnngoh suda.
Ka Iingmane ka don bun jait ki kyrteng?!
Ngam shym la shem i’u Ioannis ne U Petros,
Hynrei nga kynduh ia ki Saul ha manla ki mawit b’la tei
Ban pynher ki lama,
Ba suhsieng ka pihuiň ia la ki hynmen-para.

Kum u Rangbah-shispah, b’la shah pynmatlah
Ki khmat ban pynpeit ha Templ Philistia,
Husiar ko lok!
I’u Lucifer ba rieh ha man la ki Delilah,
Ba apthap pynlong iaphi ki mraw ka doh –
Pynliem ka waitlam ia rashi u Nongrep
Ka bor ba kyreit, ka long ka jingtlot u Dabid.

Sha Ri ksiar banylla ngan thwet bymjukut –
Ka por ka la jan.
Khie joit! Khie joit!
Me u koidi b’la shah teh mraw ha Egypt.
Tbeh la sharak, shuwa b’u Kurim un wan.
Ha shyngoid batlem, i’u koidi Diengphna pynim,
Ha miet Golgotha; khmih step phyrnai,
“Men im ha bymjukut badnga ha Paradise”.

Em,
Nga ngam long U Nehemaiah lane U Joshua ban ialam,
Hynrei ngan tei iaka templ ba un shongneh u Trai,
Ba kyntang; bakhuid,
Na bynta ka Jerusalem Thymmai.
Jerusalem thymmai ka la ĭeng,
U Nongleit-kurim ula wan.
Ko Gabriel to put jam la ka turoi –
Ĭa dwar la plie wang, ban sakhi lem ki prophet bneng;
Kawei ka met bad u Kynrad, ngi long “Ka Balang”.