Ka Poitri Matti Ba Tlem: Madam Blessibon Blah

Ia kane ka poitri la thoh da u Babu Ferdinand Kharbuli, Asst. Professor, Ri Bhoi College na bynta iwei na ki Nongseng jong ka Skul Alpha English Higher Secondary School, Nongpoh. I Babu Kharbuli i la ju noh synniang ruh kum u nonghikai ha ka Higher Secondary Section jong ka Alpha English Hr. Secondary School naduh u snem 2004 haduh u snem 2021.

MATTI BA TLEM 
(Mrs. Blessibon Blah) 

1. Na lum sha them, ka nam jongphi la bna; 
   Rympei ba donburom imain nylla, 
   Tipbriew tipblei, ka hok ki kmie ki kpa, 
   Ki spah mynsiem, iwbih matti ba kha. 

2. I mei ryngkat ki kam, ki piam, ki kdup; 
   I’i sap I’i jingnang jingtip phi kynthup; 
   Kum Tiewdohmaw b’la san ha shiteng riat, 
   Kyrhai tiewphuh, ha kper jingbiej ban rat. 

3. Phi iai khie iai plung, katkum ka hok hukum; 
   Kum kba ha pyntha, b’la thiew kynbat la khum, 
   Iai dem minot, ban iar tnum u tyndai; 
   La noh mei ngi, buit la bor khlem da tyngkai.  

4. Dur umpohliew khlok-khlok phi iai kyrsoi; 
   Symboh jingstad, jylliew kiba myntoi, 
   Paradoh parasnam, im sngi ban tei, 
   Sangsot bhasur, saindur iaka lawei. 

5. Da jingieid nia jutang ka dei, bad lor ki khnong; 
   Kumjuh shangkhung, naduh ba sngi nyngkong, 
   Kum rishot junom, kin ieng shirup-shilliang, 
   Longdien I’i rngiew I’I rwiang ban bit ban biang. 

6. Khadduh khadwai burom khraw haka pyrthei; 
   Ka iaroh rongksiar mariang naduh thymmei, 
   Ah! Khublei Kynrad Nongthaw un da u ri; 
   Na tyngkong Blei khup iaphi, h’la lyngoh kti. 

Da – U Babu Ferdinand Kharbuli 
Asst. Professor (Khasi), Ri Bhoi College, Nongpoh. 

Also read:

Poitri Khasi: KA IINGMANE